साखर आयुक्तांचा सहकार सचिवांना प्रस्ताव
पुणे ः राज्याच्या साखर उद्योगासाठी महत्त्वाच्या असलेल्या साखर आयुक्तालयात सध्या रिक्त पदांमुळे या विभागाची डोकेद् खी वाढली आहे. सहकार आणि कृषी विभागाच्या आस्थापनेवरील अधिकारी कर्मचार्यांच्या साखर आयुक्त मुख्यालय व राज्यातील क्षेत्रीय स्तरावरील प्रादेशिक कार्यालयात प्रतिनियुक्तीने नियुक्त्या केल्या जातात.
साखर आयुक्तालयांतर्गत मुख्यालय ते इतरत्र मिळून ११० पैकी महत्त्वाच्या ३१ जागा रिक्त असून ही पदे तातडीने भरण्यात यावीत, असा प्रस्ताव साखर आयुक्त डॉ. संजय कोलते यांनी राज्याच्या सहकार सचिवांना पाठविला आहेे. साखर आयुक्तांची स्वतःची आस्थापना (प्रशासन) कार्यरत नाही. त्यामुळे सहकार व कृषी विभागाच्या मर्जीनेच याठिकाणी अधिकारी कर्मचारी नियुक्त केले जातात.
आयुक्तालयातील साखर सह संचालक सचिन रावल यांची पदोन्नती पदस्थापना सहकार आयुक्तालयात अपर निबंधकपदी झाली आहे. सह संचालक (उपपदार्थ) अविनाश देशमुख हे नुकतेच सेवानिवृत्त झाले आहेत. म्हणजे मुख्यालयातील दोन महत्त्वाची पदे रिक्त आहेत. शिवाय साखर संचालक (अर्थ) यशवंत गिरी हे सुद्धा बदलीपात्र आहेत. त्यामुळे मुख्यालयातील रिक्त जागा प्राधान्याने भरल्या जाणे अपेक्षित असल्याचा मुद्दाही प्रस्तावात नमूद केल्याचे अधिकार्यांनी सांगितले. (पुढारी, ०२.०६.२०२६)
